ძვირფასო კოლეგებო და სტუდენტებო, მეგობრებო, გილოცავთ ქრისტიანული სამყაროს უდიდეს დღესასწაულს  –  უფალ იესო ქრისტეს ბრწყინვალე აღდგომას.

ცნობილ ესეში „საქანელა და სახრჩობელა“ (1920 წ.) გრიგოლ რობაქიძე წერდა: „საქართველო ქანაობს საქანელაზე: მაგრამ საქართველო უფსკრულზეა გამართული და ადვილი შესაძლოა საქანელა სახრჩობელად გადაიქცეს“. ამ სიტყვებიდან 100 წლის შემდეგ, საქართველო, მსოფლიოსთან ერთად,  უხილავ მტერს ებრძვის და, სამწუხაროდ, კვლავ დილემის პირისპირ აღმოჩნდა – „ან თავის თავის მონახვა... ან სრული დაღუპვა თავის თავისა“ (გრ. რობაქიძე).

ღირსეულად უნდა ჩავაბაროთ ეს გამოცდა, დავძლიოთ პანდემია და მეტიც, კრიზისი ნამდვილ კურთხევად და აუცილებელი კათარზისის მომტანად ვაქციოთ. ყოველი სახლის სარკმლის მიღმა დანთებულ სანთელში გადარჩენილი ერთმანეთი  დავინახოთ.

დარწმუნებული ვარ, ამ კრიზისს უთუოდ დავძლევთ და მეტიც,  ვაქცევთ კათარზისად, ბევრ რამეს გადავაფასებთ კიდევაც, მაგრამ ერთი რამ ცხადია, უფრო მეტად შევძლებთ დავაფასოთ ერთმანეთიც და ერთმანეთის შრომაც, უფრო ადვილად გავუმკლავდებით ახალ პარადიგმებს.

შეიძლება ითქვას, რომ მსოფლიო დღეს გოლგოთის მძიმე და მტკივნეულ გზას გადის, მაგრამ ამ გზის ბოლოს ხომ აღდგომა და გამარჯვებაა!

როგორც 1991 წელს აღდგომის დღესასწაულზე საქართველოს პირველმა პრეზიდენტმა ზვიად გამსახურდიამ ბრძანა: „ქართველი ერის გზა ქრისტეს გზაა, ეკლიანი გზა ჯვარცმისა და გარდაუვალი აღდგომისა“.

მჯერა, გავიმარჯვებთ საკუთარი თავის დამარცხების გარეშე, ლოცვით, საკუთარი სახლების ღვთის სახლად ქცევითა და სარკმლის მიღმა დანთებულ სანთელში გადარჩენილი ერთმანეთის  დანახვით. ჩვენი პროფესიონალი, მაღალი მორალის მქონე, სახელმწიფოებრივად მოაზროვნე გმირი მედიკოსების რეკომენდაციების გათვალისწინებითა და სამედიცინო პერსონალის, პოლიციელების, მესაზღვრეების, ჯარისკაცების თავდადებით გავიმარჯვებთ!

გვმართებს, დავრჩეთ სახლში და ვილოცოთ სამშობლოსათვის! მაგალითისა და იმედის მიმცემი გავხდეთ დანარჩენი მსოფლიოსათვის.

გილოცავთ დამდეგ აღდგომის ბრწყინვალე დღესასწაულს!

ქრისტე აღდგა!

ჭეშმარიტად აღდგა!

ზურაბ ხონელიძე,

პროფესორი,

სოხუმის სახელმწიფო უნივერსიტეტის რექტორი,

განათლების მეცნიერებათა აკადემიის პრეზიდენტი.