84 წლის ასაკში გარდაიცვალა აფხაზეთიდან დევნილი ეკონომიკის დოქტორი, ასოცირებული პროფესორი ახმეტ აკაკის ძე დანელია. ის  1936 წლის 28 სექტემბერს მარტვილის რაიონის სოფელ ნაჯახაოში დაიბადა.

1965 წელს დაასრულა ოდესის ელექტროკავშირგაბმულობის ინსტიტუტი კავშირგაბმულობის ინჟინრის სპეციალობით.

1984 წელს მიენიჭა ეკონომიკის მეცნიერებათა კანდიდატის სამეცნიერო ხარისხი.

1993 წლამდე მუშაობდა ქ. სოხუმის ფოსტამტის უფროსად. ამავე დროს კითხულობდა ლექციებს აფხაზეთის სახელმწიფო უნივერსიტეტში.

1997-2001 წლებში სამეცნიერო-პედაგოგიურ მოღვაწეობას ეწეოდა საქართველოს სუბტროპიკული მეურნეობის სახელმწიფო ინსტიტუტში.

2002 წლიდან მიჰყავდა სალექციო კურსები ივ. ჯავახიშვილის სახელობის თბილისის სახელმწიფო უნივერსიტეტის სოხუმის ფილიალში.

2007 წლიდან გახდა ეკონომიკისა და ბიზნესის ფაკულტეტის ასოცირებული პროფესორი.

2010 წლიდან იყო სოხუმის უნივერსიტეტის უხუცესთა საბჭოს წევრი.

ბატონი ახმეტის პრაქტიკული შრომა და სამეცნიერო-პედაგოგიური ღვაწლი არაერთხელ აღნიშნულა სსრკ-სა და საქართველოს მთავრობის საგანგებო ჯილდოებით.

სოხუმის სახელმწიფო უნივერსიტეტი თანაუგრძნობს ოჯახსა და კოლეგებს ასოცირებულ პროფესორ ახმეტ დანელიას გარდაცვალების გამო.