სოხუმის სახელმწიფო უნივერსიტეტში საქართველოს მეორე სახელმწიფო ენის – აფხაზურის სალექციო კურსის სწავლება ზუსტად 20 წლის წინ, 2000 წელს დაიწყო. 2010 წლამდე ეს ენა ისწავლებოდა ქართული ფილოლოგიის სპეციალობაზე როგორც ფაკულტატური (ნებაყოფლობითი) საგანი. 2010 წლიდან ჰუმანიტარულ მეცნიერებათა ფაკულტეტზე ამოქმედდა აფხაზური ფილოლოგიის საბაკალავრო პროგრამა (ხელმძღვანელი – ფილოლოგიის მეცნიერებათა დოქტორი, პროფესორი თეიმურაზ გვანცელაძე).

2018 წლიდან საქართველოს განათლებისა და მეცნიერების სამინისტრომ აფხაზური ფილოლოგიის სასწავლო პროგრამა შეიტანა იმ სპეციალობათა ნუსხაში, რომლებზე ჩარიცხულ სტუდენტებსაც სწავლის სრულ საფასურს ფარავს სახელმწიფო ბიუჯეტი, დაფინანსებული ადგილების რაოდენობად კი განისაზღვრა 5 ერთეული.

ახლახან დასრულებული ერთიანი ეროვნული გამოცდების დროს კონკურსში გამარჯვებულ აბიტურიენტთაგან 5 ახალგაზრდა ჩაირიცხა სოხუმის სახელმწიფო უნივერსიტეტის ჰუმანიტარულ მეცნიერებათა ფაკულტეტის აფხაზური ფილოლოგიის საბაკალავრო პროგრამაზე. ამ სტუდენტებს სასწავლო პროგრამის განმახორციელებელი აკადემიური პერსონალი შეასწავლის აფხაზურ ენას, აფხაზურ ფოლკლორს, აფხაზური ლიტერატურის ისტორიას, აფხაზურ-ქართულ ენობრივ და ლიტერატურულ კონტაქტებს, აფხაზეთის ა.რ. ისტორიას, აფხაზი ხალხის ეთნოლოგიას, კავკასიოლოგიის შესავალსა და ძირითად ქართველოლოგიურ დისციპლინებს.

სტუდენტები მაპროფილებელ საგნებში საჩუქრად მიიღებენ სახელმძღვანელოებსა და დამხმარე ლიტერატურას, მონაწილეობას მიიღებენ საგრანტო პროექტებში, ექსპედიციებში, სამეცნიერო კონფერენციებში, აგრეთვე სხვა ღონისძიებებში. ფაკულტეტი და უნივერსიტეტის ადმინისტრაცია ყოველგვარად შეუწყობენ ხელს ამ სტუდენტებს სწავლაში.

ვულოცავთ ახლადჩარიცხულ ახალგაზრდებს სტუდენტობას!

ვუსურვებთ მათ წარმატებებს სამშობლოს სასიკეთოდ, ქართულ-აფხაზურ ურთიერთობებში სასიკეთო წვლილის შეტანასა და საკუთარი ცოდნის სრულად გამოვლენას!