2021 წლის 27 იანვარს სოხუმის სახელმწიფო უნივერსიტეტში ჩატარდა უნივერსიტეტისა და „ისრაელის სახლის“ ერთობლივი ღონისძიება, რომელიც ჰოლოკოსტის მსხვერპლთა ხსოვნას მიეძღვნა.

 ღონისძიება ისრაელის და საქართველოს სახელმწიფო ჰიმნებით გაიხსნა.

 დამსწრე საზოგადოებას მისასალმებელი სიტყვით მიმართა სსუ-ის რექტორმა, პროფესორმა ზურაბ ხონელიძემ, ისაუბრა ჰოლოკოსტის შემზარავი ტრაგედიის დეტალებზე, ქართველ და ებრაელ ხალხთა მეგობრობაზე:

„– დღეს, მსოფლიო, გაერო-ს გენერალური ასამბლეის 2005 წლის გადაწყვეტილებით, ჰოლოკოსტის მსხვერპლთა ხსოვნის საერთაშორისო დღეს აღნიშნავს. ცივილიზებული სამყარო პატივს მიაგებს სრულიად კაცობრიობის ისტორიაში ერთ-ერთი ყველაზე დიდი ტრაგედიის მსხვერპლთა ხსოვნას. ჰოლოკოსტის დღის აღნიშვნა საქართველოში ტრადიციად იქცა. სიმბოლურიცაა, რომ ეს ღონისძიება დღეს სოხუმის სახელმწიფო უნივერსიტეტში იმართება. თითქმის 30 წელია უნივერსიტეტი მშობლიური მიწიდან დევნილია და ჩვენი ისტორიაც ერთ-ერთი მაგალითია იმისა, რომ ეთნიკური ნიშნით სიძულვილს თან სდევს უდიდესი ტრაგედიები. სოხუმის სახელმწიფო უნივერსიტეტი დღეს პატივს მიაგებს სრულიად კაცობრიობის ისტორიაში ერთ-ერთ ყველაზე შემზარავი ტრაგედიის, ჰოლოკოსტის მსხვერპლთა ხსოვნას“.

 „ისრაელის სახლის“ დამფუძნებლის და ხელმძღვანელის, იციკ მოშეს თქმით, სახელმწიფოს შექმნის შემდეგ, ისრაელმა დაიწყო იმ ადამიანების მოძიება, რომლებმაც ნაცისტური ოკუპაციის წლებში, საკუთარი სიცოცხლის რისკის ფასად გადაარჩინეს ებრაელები. მათ ისრაელის მიერ მინიჭებული აქვთ „მართალის“ წოდება, ხოლო მათი სახელი უკვდავყოფილია იად ვა შემის მემორიალური მუზეუმის მიერ.

 სპეციალურად ამ ღონისძიებისთვის, ისრაელიდან ონლაინ ჩაერთო, ბატონი ხილიკ ბარი – ისრაელის ქსენეთის ყოფილი ვიცე-სპიკერი, რომელმაც ქართველი და ებრაელი ხალხების მოგობრობაზე ისაუბრა და მადლობა გადაუხადა სსუ-ის რექტორს, ჰოლოკოსტის მსხვერპლთა ხსოვნისადმი მიძღვნილი ღონისძიებისთვის.

 საზოგადოებას სიტყვით მიმართეს სსუ-ის საერთაშორისო ურთიერთობათა და კულტურათაშორისი კავშირების სამსახურის უფროსმა, პროფესორმა ინდირა ძაგანია და ცნობილმა ქართველმა ჟურნალისტმა და საზოგადო მოღვაწემ, პროფესორმა ნუგზარ რუხაძემ.

 ღონისძიებაზე ნაჩვენები იყო კადრები ფილმებიდან „ჰოლოკოსტი“ და „სერგი მეტრეველი – ქართველი შინდლერი“ , ხოლო მომღერალმა ქრისტინე ჯაფარიძემ ებრაული სიმღერები შეასრულა. ჰოლოკოსტის მსხვერპლთა სულების პატივსაცემად, დარბაზში ხსოვნის სანთლები დაენთო.

 დასასრულს რექტორმა ზ. ხონელიძემ განაცხადა:

„– ისრაელის სახლთან“ და მის ხელმძღვანელთან, ბატონ იციკ მოშესთან თანამშრომლობით, სოხუმის სახელმწიფო უნივერსიტეტში გაიხსნება ისრაელის აუდიტორია-მუზეუმი: „სოხუმი-იერუსალიმი“, სადაც სტუდენტი-ახალგაზრდობა, ჩვენ მოძმე ერზე - ებრაელ ხალხზე და მეგობარ ქვეყანაზე – ისრაელზე, ბევრ ახალ და საინტერესო ფაქტებს გაეცნობა“.

 ღონისძიებას ესწრებოდნენ სოხუმის სახელმწიფო უნივერსიტეტის ადმინისტრაციის ხელმძღვანელი, პროფესორი ნინო თოფურიძე, სსუ-სა და „ისრაელის სახლის“ თანამშრომლები.