2022 წლის 8 ივნისს სოხუმის სახელმწიფო უნივერსიტეტის ბიზნესისა და სოციალურ მეცნიერებათა ფაკულტეტზე ჩატარდა სტუდენტთა საიუბილეო სამეცნიერო კონფერენცია, რომელიც  სოხუმში უმაღლესი სასწავლო დაწესებულების დაარსების 90-წლისთავს მიეძღვნა.

კონფერენცია გახსნა და სტუდენტებს მიმართა ფაკულტეტის დეკანმა, პროფესორმა ირმა დიხამინჯიამ, რომელმაც ხაზი გაუსვა სტუდენტური კონფერენციის მიზანსა და მნიშვნელობას, რაც სამეცნიერო საქმიანობაში სტუდენტთა აქტიური ჩართვის სტიმულირებაში აისახება; ახალი იდეების გენერირება, კვალიფიციური სპეციალისტების მომზადება, სტუდენტური სამეცნიერო კვლევების წახალისება, სტუდენტებს შორის ცოდნისა და გამოცდილების გაზიარება – ეს ყოველივე წარმოადგენს ჩვენს უპირველეს ამოცანას, – განაცხადა დეკანმა და აქვე, სოხუმის სახელმწიფო უნივერსიტეტის რექტორის, ბატონ ზურაბ ხონელიძის ნაშრომიდან – „მშვიდობის ქართული პარადიგმა“ - ამონარიდი მოიხმო, რომ „განათლება, მეცნიერება და მოტივირებული ახალგაზრდობა, ესაა, რაც თანამედროვე გამოწვევების დროს ყველაზე მეტად ღირებულია და რაც თავისუფლად თანაარსებობს მხოლოდ თავისუფალ სივრცეში – საუნივერსიტეტო სივრცეში“. სწორედ,  ამ სივრცეში გაქვთ სტუდენტებს ყველა შესაძლებლობა, რომ მიიღოთ სრულყოფილი განათლება, შეიარაღდეთ ცოდნით. როგორც რექტორი აღნიშნავს, მხოლოდ განათლებაში, სამეცნიერო პოტენციალის სწორი გზით წარმართვაში, განათლებისთვის ახალი სულისკვეთების შთაბერვაშია, ჩვენი ხსნა, – განაცხადა დეკანმა, რომელმაც კიდევ ერთხელ მიულოცა საიუბილეო თარიღი დამსწრე საზოგადოებას, კონფერენციაში მონაწილე სტუდენტებს, მათ სამეცნიერო ხელმძღვანელებს და წარმატებული სექციური სხდომების ჩატარება უსურვა.

კონფერენციის მონაწილეებს მიმართა სოხუმის სახელმწიფო უნივერსიტეტის რექტორმა, ბატონმა ზურაბ ხონელიძემ: „მიხარია, რომ მოდის აქტიური, მოტივირებული, მიზანმიმართული, თანმიმდევრული, შედეგზე ორიენტირებული თაობა, რომელსაც ესმის მიზეზი და მას არგებს საშუალებას. დღეს საქართველოში ყველაზე ქართული კერა სოხუმის სახელმწიფო უნივერსიტეტია და უდიდესი პატივია ატარებდეთ „სოხუმელის“ სახელს. თქვენ, ამ უნივერსიტეტის სტუდენტებს, ყველა საფუძველი გაქვთ იამაყოთ, რომ ყველაზე ჯანსაღი და ქართული საგანმანათლებლო კერის – სოხუმის სახელმწიფო უნივერსიტეტის სტუდენტები ხართ. და, რადგანაც, თქვენ თქვენს თაობაში ხართ გამორჩეულები, გაქვთ  გააზრებული, გაცნობიერებული ყოველივე ეს და რეალურად ემსახურებით ამ კერას, ჩვენ ჩვენს წილ პასუხისმგებლობას ვგრძნობთ და ყველაფერს გავაკეთებთ თქვენთვის. ჩვენ ერთიანობაში უნდა შევავსოთ ერთმანეთი და ვიქცეთ იმ ჯანსაღ ძალად, რომელიც მოემსახურება ჩვენი ქვეყნის უკეთეს მომავალს. თქვენ უნდა ჩამოყალიბდეთ ლიდერებად და თქვენი ცოდნა, განათლება გახდება სახელმწიფოებრივი ხედვის საფუძველი, რომელიც მოემსახურება ყველაზე დიდ მიზანს – თავისუფლებას! ჩვენი ერთიანობით, ადამიანებისა და ტერიტორიების გამთლიანების სურვილით, ქმედებით, შევძლებთ სასურველი მიზნის მიღწევას, ამიტომ, ნუ დაველოდებით კარგ დროს, დრო ვამუშავოთ ჩვენს სასარგებლოდ, ჩვენი ქვეყნის სასარგებლოდ. თქვენ ხართ ამ ქვეყნის მომავალი!“

კონფერენციის მოდერატორმა, ბიზნესისა და სოციალურ მეცნიერებათა ფაკულტეტის დეკანის მოადგილემ, პროფესორმა დავით ზაქარაიამ, სატუდენტთა სამეცნიერო კონფერენციის საორგანიზაციო კომიტეტის მიერ შემუშავებული გეგმა და სექციების განრიგი წარუდგინა დამსწრე საზოგადოებას.

კონფერენციის მონაწილეებს სიტყვით მიმართეს ბიზნესის ადმინისტრირების მიმართულების პროფესორებმა: დავით ჯალაღონიამ, ლარისა თაკალანძემ, ზურაბ ლიპარტიამ, გიორგი ბერულავამ, საერთაშორისო ურთიერთობების მიმართულების ხელმძღვანელმა პროფესორმა ომარ არდაშელიამ, პოლიტიკის მეცნიერებების მიმართულების ხელმძღვანელმა გურამ აბესაძემ, ფსიქოლოგიის მიმართულების ხელმძღვანლმა პროფესორმა კახი კოპალიანმა, სოციალოგიის მიმართულების პროფესორმა ნესტან ლომაიამ.

საკუთარი აზრი გამოთქვეს სტუდენტებმა: ლუკა კვირკვიამ, ნინო ცუცხუბაიამ, ეკატერინა ბენდელევამ და სხვებმა.

პირველივე დღეს, კონფერენციაზე საკუთარი მოხსენებები წარმოადგინეს სტუდენტებმა: ნინო ფუტკარაშვილმა (სოციალური ფსიქოლოგია, მე-2 კურსი, მეცნიერ-ხელმძღვანელი პროფესორი კახი კოპალიანი); სანდრო შპეტიშვილმა (პოლიტიკის მეცნიერებები, მე-4 კურსი, მეცნიერ-ხელმძღვანელი პროფესორი დავით ზაქარია); დავით ჯანაშვილმა (ბიზნესის ადმინისტრირება, მე-4 კურსი (მეცნიერ-ხელმძღვანელი პროფესორი დავით ჯალაღონია); გიორგი თოფურიამ - (ეკონომიკის მიმართულება, მე-4 კურსი, მეცნიერ-ხელმძღვანელი პროფესორი კახა ციმინტია).

აქვე უნდა აღინიშნოს, რომ სტუდენტთა სამეცნიერო კონფერენციის დასრულების შემდეგ (8 – 15 ივნისი) შერჩეული მასალები დაიბეჭდება სტუდენტთა სამეცნიერო შრომების კრებულში, მონაწილეებს გადაეცემათ სერტიფიკატები.