2022 წლის 21 მარტს,  სოხუმის სახელმწიფო უნივერსიტეტის რექტორმა, პროფესორმა ზურაბ ხონელიძემ,  ხელნაწერთა ეროვნული ცენტრის წარმომადგენლებს უმასპინძლა.

მეორე წელია, სოხუმის სახელმწიფო უნივერსიტეტისა და კ. კეკელიძის სახელობის საქართველოს ხელნაწერთა ეროვნული ცენტრის თანამშრომლობით, ხორციელდება ერთობლივი პროექტი — საერთაშორისო სეზონური სკოლა „აფხაზეთი: შუა საუკუნეებიდან დღემდე (ისტორიულ-კულტუროლოგიური ასპექტები)“.

პროექტი დაფინანსებულია შოთა რუსთაველის ეროვნული სამეცნიერო ფონდის მიერ, “საქართველოს ოკუპირებული ტერიტორიების შემსწავლელი სამეცნიერო კვლევითი პროექტების ხელშეწყობისა და საერთაშორისო სამეცნიერო ღონისძიებების საგრანტო კონკურსის” ფარგლებში.

პროექტის ხელმძღვანელთან, თეა ქართველიშვილთან და პროექტის კოორდინატორთან, ირინა გოგონაიასთან შეხვედრისას  საუბარი შეეხო მიმდინარე პროექტის განხორციელების დეტალებს, დაისახა სამომავლო პერსპექტივები.

სოხუმის სახელმწიფო უნივერსიტეტის რექტორმა, პროფესორმა ზურაბ ხონელიძემ ხაზი გაუსვა მეცნიერების, განათლებისა და უმაღლესი სასწავლებლების გადამწყვეტ როლს კონფლიქტის მოგვარების საქმეში.